台北縣長周錫瑋原定上禮拜四率團訪港，因遇着颱風「莫拉克」重創台灣，佢臨上飛機前一刻決定折返，留守大本營
實颱風動向，延遲到尋日中午先抵港。訪港行程剩番下半集，重點變成喺佢嘅個人畫展上。周縣長習畫九年，無師自通繪出個人色彩，佢今日會為喺藝術中心包氏畫廊舉行嘅個人油畫展剪綵，展出三十幅作品。
對香港印象如何？佢話十幾年前曾首次到訪香港，嗰時冇幾多個港人識講普通話，估唔到事隔十幾年，港人「煲冬瓜」大有進步喎。
周縣長抵港後見咗菁英會主席施榮忻。施榮忻話八年前佢加入本港一個名叫「神仙老虎狗」嘅聯誼組織，同一班生肖屬狗或虎嘅台商老友鬼鬼，今次都係因為台商搭路，先可以咁快見到周縣長。