為立會選舉打定樁腳

正所謂人多好辦事，工聯會有三十二萬會眾，梗係用人海戰術啦！聽聞工聯會瞄準泛民會派兵嘅選區，人哋話撒豆成兵，而棠哥就好似牛魔王咁撒晒啲牛蝨落區，填滿建制派嘅「空白」戰點，仲係對準泛民主派嘅選區。

○七年區選一役，泛民參選嘅選區有近三百個，二○一一年相信亦差唔多，工聯會勝在人多勢眾，資源唔成問題，但工聯會最終亦唔會出戰晒三百個選區，事關大前提係盡量避免同建仔「撞區」，如果建仔都有意同泛民對撼，工聯會同建仔會事先打招呼，協調由邊一方參選，費事相爭，畀對手漁人得利。

工聯會依家約有二十一名區議員，同建仔或白鴿黨相比只係起步階段，兩年後全面進軍區選，歷史包袱同心理負擔相對較細，有意外收穫固然值得開香檳慶祝，就算輸咗，咪當係大規模練兵，為二○一二年立法會選舉五大選區打定樁腳囉，尤其可以乘機開拓工聯會嘅傳統弱區，好似九龍東同港島咁，簡直係千載難逢嘅機會。一場選戰嘅部署，可以連叫兩鋪胡，點計都有着數吖。

講開二○一二年立法會選舉，工聯會兩個勞工議席代表冇連任機制，葉偉明三年後好大機會轉戰新界東，本身喺公立醫院擔任顧問醫生嘅潘佩璆，或以其專業形象轉戰中產票倉港島。至於新任理事長吳秋北係咪出戰九龍西則仲未明朗，事關如果九龍西嘅選區範圍劃界擴大，議席有機會由四席變五席，成個形勢唔同晒，到時先至深入研究都未遲。