港島有間孫中山紀念館，睇怕冇乜人去過，一來當局宣傳得唔夠，二來展品有限，唔夠吸引。香港係孫中山讀書同進行革命活動嘅重要地方，紀念館搞到水盡鵝飛已經夠丟架啦，更離譜嘅係，有好多珍貴文物畀康文署當廢物，有啲甚至不翼而飛。

原來早喺○一年紀念館籌建嗰陣，康文署已經派人去美國買入約二千七百件孫中山文物。使成百萬蚊買批文物，當時居然冇人點數，運到香港至發現唔見咗二十一件，其中有啲仲十分罕有，包括宋慶齡親筆簽名嘅孫中山照片等。

叮！去街市買斤菜都要睇清楚新唔新鮮，夠唔夠秤啦，大拿拿使大筆公帑買返嚟嘅珍貴文物，處理過程咁兒戲，望多兩眼、點多幾次都慳番。至弊發現文物不知所終之後，康文署竟然當乜事都冇發生過，既冇報警，又冇追究任何人，直到○五年底，呢單混帳醜聞至畀審計署知道。

不過，審計署同樣不知所謂，報告初稿仲有提及呢盤「爛數」，報告出街嗰陣，居然將有關段落刪除，同樣當冇事發生過。明明查出有問題，而且仲涉及公帑，點解要將康文署遺失珍貴文物嘅內容抽起，粒聲唔出？係咪官官相護？審計署欠市民一個交代。

審計署署長鄧國斌尋日回應話，○六年曾要求康文署調查，對方亦表示會咁做，但係一直冇回覆，所以審計報告就冇提到呢件事。

問題係，康文署有冇查過？結果係點？市民根本無從知道，如果唔係有人踢爆，市民可能永遠都唔知發生乜事，咁即係你哋兩個部門玩晒啦。

康文署副署長鍾嶺海仲搞笑，佢尋日承認當年冇仔細點算過文物，估計遺失咗嘅冇可能搵得番，又話後來發現批貨多咗四百幾件原本冇訂購嘅文物，聽落好似康文署仲「賺」咗添。係咁，使唔使頒番個嘉許狀吖？

叮！真金白銀買返嚟嘅少咗二十一件，唔知乜頭乜路嘅無啦啦多咗幾百件，仲當正自己執到，呢啲正一叫烏龍百出。康文署到底知唔知自己買咗乜(o架)？唔怪得成批近三千件文物，依家喺孫中山紀念館展出嘅只得六件咁大把啦。

醜聞雖然喺八年前發生，周達明嗰陣仲喺環境運輸及工務局，調任康文署署長咁多年，居然冇做過任何嘢，到底係真唔知定係詐傻扮懵？

嗱，唔該周達明你醒醒定定，咪諗住好似當年飛去美國洽購文物嗰個歷史博物館館長咁，話就話被紀律處分，但留低鑊杰嘢仲可以拍拍屁股去升官。唔搞番掂呢壇嘢，就算你去咗發展局，太一叮一定會繼續叮落去(o架)？！