譬如環保署嘅官員可以舉例話，佢哋個助理署長開工睇鹹網，放工之後，輪到首席環保主任接更，證明該署要輪更工作，所以應該當係紀律部隊看待。此外，機電工程署嘅技工亦可以向公務員事務局提出，由於日常要士巴拿、鐵錘跟身，可見同警察一樣，都係屬於「佗鐵」一族，理應享有警察同等待遇至公道。

到時全港公務員變晒紀律部隊，得番三司十二局加埋一個特首唔係，香港特別行政區可以改名，不如叫「香港特別無紀律行政區」啦。

網友回應

阿Sir

成班公務員身在福中不知福，家陣個市咁差，一般打工仔唔炒已經偷笑啦，仲話想加人工添，把幾火呀。

dUNnO

下下咁樣威脅市民，一個話罷工，一個話唔幫病人插喉，咁冇紀律都可以稱為紀律部隊，一百歲唔死都有新聞。

holly

身為公僕是為市民服務吧，何況紀律部隊的薪金已不錯，要是想要多點工資，就離開政府啦！仲有呀，當中不乏因為讀唔成書而投考紀律部隊㗎，你想要幾多錢呀？

March

一日都係警察麻鬼煩，先至搞到其他嗰班消防、海關之類唔順超，真係怕遲啲會出現番「有水放水，冇水散水」。

shiiiiiiiiiiiiiiii

成日掛住出糧，完全冇維護法紀嘅心，郁啲話影響士氣，咁唔想做咪出嚟私人市場試吓囉，到時佢哋就知味道。

阿田

如果佢哋真係用影響市民日常需要來要脅政府，佢哋仲係公僕咩？唔好忘記，服務市民係佢哋嘅使命，無心嘅就唔好做！影衰晒其他真心為市民的公僕！

網址：www.sunsiupak.blogspot.com