議會新丁陳克勤上個月尾帶咗一百個學生上江西農村,體驗吓農民生活。佢話江西農村仲係好落後,大小解嘅地方都係旱廁,除臭氣熏天外,仲有視覺上嘅難堪,好多女同學都頂唔順寧願唔去,但佢身為團長點都要身先士卒,最多係速戰速決咁話喎!但佢由同學口中得知,江西有啲小朋友唔止唔怕臭,仲爭分奪秒帶埋書入去讀,深深感受到兩地文化差異。
當大家喺農民屋企食飯時,見到啲餸畀好多烏蠅圍住,個個學生都唔敢食,為咗唔想失禮人,克勤仔惟有再次頂硬上帶頭夾餸,但最後咁多碟餸,唯一食得晒嘅係班學生自己整嘅意粉,睇嚟佢嘅動員力有待加強嘞。