台北縣官商代表團前日訪港，負責帶隊嘅台北縣經濟發展局局長李斌話，喺台灣做官一星期要做足七日，二十四小時Stand-by冇停手，搞到有時連同屋企人食餐飯嘅時間都冇！李斌一聽到香港班高官不時可以放暑假、去旅行，開到口話好羨慕。

李斌唔止冇得放暑假，仲要做空中飛人台港兩邊跑。事關佢上星期嚟咗香港同全國政協委員李大壯食飯；星期三朝早飛返台灣，之後再跟團飛返嚟，真係飛到頭都暈。但佢不忘本分，努力推銷台北縣，聽聞李大壯有朋友好鍾意去日本浸溫泉，佢立即推薦台北縣嘅溫泉旅館，仲話喺香港去台灣，計埋塔飛機坐車，再浸多兩個鐘溫泉，加埋都只係五六個鐘；如果去日本浸，可能連溫泉門口都未到。

佢仲不停推銷九份、淡水等景點，大讚台灣嘅美食，話中國菜、日本菜同海鮮都比香港嘅好食，但廣東菜就淨係得香港先夠地道喎！