賭王何鴻燊忽然入深切治療部留醫，哄動全城。尋日喺一個圖片展上見到已故全國政協副主席霍英東二公子霍震寰，佢話唔想喺呢個時候打擾何家，所以冇打電話畀賭王嘅家人，亦唔知賭王嘅情況，一切都係靠睇報紙。
霍震寰係澳門霍英東基金坐入澳娛嘅代表，所以佢每個月至少見賭王一次，對上一次見賭王係喺六月底，七月底佢公幹離港冇去到開會，但係六月底嗰次，仲見賭王精神唔錯，忽然聽到賭王入院嘅消息，佢都有啲愕然，希望賭王快啲出院，可以一齊去中華遊樂會打網球。
提起佢幼子啟文同賭王女兒超雲嘅緋聞，佢話佢哋冇拍拖，只係一齊喺英國讀書，玩得熟落，但佢都補番一句：「講番轉頭，後生仔拍拖嘅嘢好正常，唔拍拖先至唔正常啦！」