話時話，康文署喺○一年開始籌建孫中山紀念館，至今八年內有三任署長，周達明嘅上手就係調咗去做環境局常秘嘅王倩儀，再上一手係退咗休、依家係廠商會CEO嘅梁世華。

王倩儀梁世華唔使上身？

若果以常理推斷，呢三任署長應該都對遺失文物事件知情，但全部當冇事發生，雖然其中兩個不在此位，但係咪一走了之，就唔使上身？喺咪會揪出成村人出嚟，咁就要睇吓審計署署長點做嘞！

再加多筆，「官場肥師奶」民政事務局常秘尤曾家麗，就係當年同孫中山先生合稱「四大寇」嘅革命元老尤列嘅曾媳婦，幾年前仲送咗曾老爺嘅墨寶畀孫中山紀念館，依家竟然喺佢所屬政策局轄下嘅部門遺失曾老爺當年老死嘅文物，唔知肥師奶事前又知唔知情？又有乜感想呢？

其實，周達明龜縮早有前科，最經典嘅係舊年赤柱冧樹壓死人，佢竟然話「可以接受」，龜縮咗半年先至肯不情不願咁認衰道歉。之前該署爆出嘅醜聞數目，多到同外號「每周一鑊」嘅食物及衞生局局長周一嶽有得揮，包括奧運期間免費book場大混亂，同埋最近嘅隱瞞員工感染豬流感同摩士糞池事件。佢同署內員工嘅關係亦非常惡劣，最終搞到多個康文署工會破天荒喺七一上街反政府，係回歸十二年來首次。

最慘嘅係即將接佢手嘅馮程淑儀，正因為想有多啲時間陪家人先要求調離二十四小時候命嘅新聞處處長，依家一上任就要處理周達明剩落嘅大堆蘇州屎，想早啲放工返屋企都幾難。