依家紀律部隊爭薪行動一發不可收拾，警隊要求改善薪酬風波啱啱平息冇耐，點知其他紀律部隊又齊齊作反。

呢嗱，消防員要求盡快落實危險津貼、削減工時；救護員為咗反對削減津貼，不排除集體拒絕替市民插喉施藥。另外，入境處舉行過集思會，爭取薪酬福利同其他紀律部隊看齊。

眼見紀律部隊排住隊籠裏雞作反，懲教署職方當然唔執輸，準備舉行研討會要求縮減工時。仲有個海關見機不可失，話佢哋喺緝毒、反走私等範疇嘅工作同警隊極之相近甚至係一樣，要將薪酬差距收窄。

紀律部隊嘅訴求五花八門，講到尾，只係想趁呢個時機博懵搵着數之嘛。代表逾二萬紀律部隊人員嘅政府紀律部隊人員總工會仲警告，如果港府最終提交行會嘅建議偏幫警隊，其他部隊會發動上街行動抗爭，甚至不排除有罷工可能，擺到明就係挑戰特區政府管治權威同埋威脅市民。

叮佢個鎯鎯，香港公務員係咪世界上最好嘅公務員隊伍，大家心照，但佢哋肯定有世界上第一流嘅薪酬待遇，而且紀律部隊嘅待遇已經比其他公務員優越得多，最弊係佢哋身在福中不知福，完全當納稅人無到，未免太過飛擒大咬！

不過講到始作俑者，一日都係當局處事不公，帶頭分化公僕隊伍。事實上，今次紀律部隊咁激烈嘅抗爭行動，好明顯係衝住警隊而來。鬼咩，正所謂「不患寡而患不均」，如果唔係當局厚此薄彼特別買警隊怕，又點會引起其他紀律部隊咁強烈嘅反彈呢？

叮佢個鎯鎯，呢啲咪叫做「弱勢政府百事哀」囉，港英管治嗰時又唔見有人作反？邊有公務員夠膽開聲講罷工㗎，係香港回歸之後至有咁嘅奇聞。難怪成日有人話「五十年不變」已經證明咗係得啖笑，應該叫做「五十年不管」至真！

唔好話太一叮唔單聲，再畀呢班紀律部隊威嚇得逞，肯定會後患無窮。到時其他非紀律部隊嘅公務員會話政府大細超，要求同紀律部隊同工同酬，否則運輸署話要罷工，任得亡命小巴喺馬路舞龍咁舞；食環署就話按章工作，一個月捉一隻老鼠；環保署齊齊怠工，一日上足八個鐘鹹網。睇吓呢個特衰政府點收科。

公務員事務局局長俞宗怡唔好再懶懶閒，以為「頭痛醫頭，腳痛醫腳」過到骨就算呀，再咁落去，政府遲早被班公務員打殘，到時候，睇怕要搵駐港解放軍出嚟維持秩序至得。