蘇利民越洋來港做醫管局行政總裁已經三年嘞，近日再獲續約三年。佢尋日向傳媒主動報料話搬咗去旺角住，理由係貪嗰區夠旺，但問真啲，原來係何文田加多利山至真，唔係旺角區。話說佢來港時落腳上等人聚居嘅半山區，其後搬去西貢，但又嫌交通唔方便。
年前佢索性搬去何文田，去亞皆老街嘅醫管局總部返工近好多，但佢以為何文田屬旺角區，經常話畀人知佢係旺角人，最鍾意去旺角捐窿捐罅，例如行金魚街。
雖然來港三年，但佢嘅廣東話仲係好水皮，所以近日四出搵番個貼身助理做「發聲字典」。咁有乜條件呢？佢話嗰個人既要熟悉政府同醫管局運作，又要幫佢了解香港文化，依家手上收到一百二十封申請信，下禮拜開始面試揀人。