之前有個環保署首長級男高官返工睇足六個鐘鹹網，依家又爆多個首席環保主任出嚟，同樣係資深色情網頁專家，只不過，佢同前上司分工好清楚，一個返工睇，佢就等放工OT至執二攤接力再戰鹹網，可見呢個部門都算幾長幼有序，值得嗰班冇大冇細、郁啲就晒馬嘅警察叔叔多多學習。

計正環保署裝得嗰套電腦監察系統偵測自己人，肯定唔止得兩丁友咁少，呢個鹹官今次斷正，其實都抵佢死。坐喺前面嗰個阿叔咪又係睇緊囡囡，隔籬嗰個阿姐睇港男睇到流晒口水添，因乜事個個都捉，淨係推佢出嚟祭旗？小白老弟認為呢兩條友都好應該檢討一下，喂，睇還睇，唔好用咁多廁紙得唔得？仲要掉到一地都係，睇鹹網事小，咪影衰晒環保工作啦！

網友回應...X）...

基仔

上司下屬齊齊睇，你睇完我睇，個個月做好呢份工，十幾萬落袋，咁筍嘅工邊度搵吖。

戰士

諸君實未能理解官之用心！待於辦公室內觀賞人體藝術影片，實為環保之舉！從而減少不外出搭車、不消費、不耗電梯、不上餐館等等，大家可知已用少了多少地球資源？

肥龍

政府想推動網上閱讀，環保署咪先試睇鹹網，唔睇鹹書，睇吓可以砍少幾多棵樹囉！不過怕唔怕畀人話打壓出版業㗎？發展局同業界跟進吓好喎！部門之間要協調吖嘛！

Jun

返工睇足六個鐘，仲拗話唔係工作時間睇，搵鬼信咩？返工冇嘢做睇鹹網，睇到收咗工都仲要睇，勁，政府真係要開多幾份咁嘅筍工至得。

猛男

六個鐘喎，你叫我連續六個鐘睇住個電視隻眼都盲啦，仲要心跳加速、熱血沸騰咁睇六個鐘，耐力簡直驚為天人！呢啲咪就係用十幾萬請佢唔請我嘅原因囉！

怒加

其實呢個政府都幾支持環保吖，好似嗰個環保署助理署長咁，喺私人公司炒咗九世啦，但公務員事務局竟然畀佢調職算數，呢啲咪叫做廢料回收囉。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。

網址：www.sunsiupak.blogspot.com