十四號正式告別官場嘅社署署長「阿魚」余志穩，尋日接受網上電台訪問時多次強調：「我肯定唔會加入商界！」仲話打死都唔會好似梁展文咁從事一啲令政府尷尬嘅工作，佢早年曾處理過舊區重建賠償方案，所以退休後唔會從商，更加唔會加入地產界，以免瓜田李下。
做咗社署署長兩年零一個月，佢話退休後最想做義工，幫吓弱勢社群，仲講到明要特別小心，喺退休後一年內，就連唔收錢做義工都要去一啲冇受社署資助嘅社福機構。
佢好無奈咁話做咗公務員二十九年，深諳公務員制度嘅遊戲規則，署任兩年冇得「坐正」固然失望，但就唔會耿耿於懷喎。主持節目嘅立法會議員劉慧卿憤言：「做到嘢嘅冇得升，做唔到嘅就攞金紫荊、做特首辦，政府有冇搵過你做特首辦吖？」反而阿魚好豁達，仲笑言：「我做咗二十九年都冇人搵我，即係依家都唔會搵。」