申辦臻美黃乾亨學校嘅辦學權落敗,林大輝中學嘅校監兼立法會議員林大輝至今仍耿耿於懷。
大輝尋日話一直好想搞一條龍教育,多次向教育局打探有冇機會開辦附屬小學,但對方話政府依家仲喺度殺緊校,邊有可能畀佢再開學校?其後等到臻美呢個機會,佢哋花咗好多時間同心血申請,點知最後連面試嘅機會都冇,學校上上下下都好失望,並質疑評審程序欠缺透明度,令佢哋死咗都唔知乜事。佢哋下個禮拜會召開校董會自我檢討,之後會向教育局跟進,問吓自己衰咗啲乜。
呢次大輝扮神探,竟然係查自己嘅死因,但佢強調唔係因為輸唔起,而係等下次再有同類機會時可以再做好啲,增加勝算喎!
佢亦經常檢討自己做議員嘅表現,例如早前有電視台記者唔認得佢個樣,就連佢噏埋個名對方亦唔識,令佢好唔開心,猛咁問點樣可以提升知名度。有記者講笑咁建議佢買番個口靚模攬枕博見報,佢話唔會靠呢啲嘢,但言談間都流露出佢好羨慕啲口靚模可以咁出名咁多人識。