地產代理監管局尋日宣布委任前禁毒專員余呂杏茜出任行政總裁，並因而引起爭議。究竟係啲前高官嘅條件真係咁好，次次都可以擊敗其他做開私人機構嘅應聘者吖，定係啲法定同公營機構有難言之隱，想唔請番啲前高官都唔得？

近年嚟，由前高官出任法定同公營機構高層嘅情況有愈嚟愈猖獗嘅趨勢，支持嘅就認為前高官較熟悉公營部門嘅運作同官僚程序，較易上手同冇咁容易撞板，搵啲打開私人工嘅做反而仲多問題，例如早前西九管理局行政總監程少泉上任一個禮拜就劈炮，就被指係同唔適應公營機構運作有關。

但亦有好多人認為啲前高官普遍缺乏靈活性同新思維，在任時又同啲公營機構或相關嘅政策部門主管有千絲萬縷嘅關係，令人質疑佢哋真係因為條件同經驗優勝，定係全靠做官時識得人多，先可以咁易搵到筍工。

做禁毒專員時識落唔少人

余太離開政府前係出任公務員事務局副秘書長，同地監局工作似乎冇乜關係，但佢之前出任保安局禁毒專員時，就曾專責處理打擊清洗黑錢工作，其中一個監管對象就係地產代理，以防範有人借買賣樓宇洗黑錢，在任時亦多次去過地監局開會同主持講座，肯定識落唔少人。據聞公務員事務局亦花咗唔少時間審核余太嘅退休後就業申請個案，拖咗成個月先拍板批准。

地監局強調今次委任係經過公開招聘，喺七十五份申請中揀出八人進行面試，最終認為余太係最合適嘅人選。但講開又講，原來余太嘅上手陳佩珊都係前高官，眾裏尋他千百度，都係搵番前高官！