港府應立法會要求向城規會一次過申請擴建，包括將立法會綜合大樓高座由原先嘅十層加高到十五層，原有十層樓嘅可用樓面面積亦相應大幅增加。行政署發言人話，申請擴建係諗住一旦政改方案通過，立法會議席最多會增至一百二十人，需要額外嘅樓面面積，不過依家唔會「一次起咁多」。

嗱嗱嗱！咪以為呢個慢三拍政府醒咗，識得未雨綢繆吖。政府原本諗住分四期逐次向城規會申請擴建，據講立法會有人驚「第日唔畀加建點算」，於是修改計劃，申請一次過搞掂。

叮！立法會成日聲大大話呢度填海填多咗，破壞維港景觀；嗰度起樓起高咗，擋住山脊線，依家輪到自己起新議事堂就用另一套標準，想加就加，仲要一次過加足一半添。唔怪得有環保組織批評擴建申請荒謬，「自己享用嘅地方就咁鬆，對人哋就咁惡」，係嚴人寬己，「生人霸死地」，擔心立法會日後嘅擴建工程變成「無王管」。

有個偉人曾經講過，當你用一隻手指指住人哋嗰陣，同時有幾隻手指指向自己。有口話人，冇口話自己，咁樣嘅立法會，仲邊有公信力吖。班議員平時起晒槓，問心嗰句，如果項目唔係同新立法會大樓有關，會唔會咁順攤過到骨？好明顯係雙重標準啦。

其實，立法會表現掂唔掂，市民自有公論。中文大學亞太研究所最近一次民調發現，滿意立法會過去一年表現嘅受訪者只有一成多啲，唔滿意嘅有三成三；四成幾人認為議員表現過晒火位。市民評價咁負面，議員聽到都面紅啦。

早幾日有人批評立法會「自我膨脹」，引起一場爭議。其實諗落，議員的確係需要好好反省一下，近年來，立法會畀人印象淨係包拗頸，喺議事堂嘈喧巴閉大隻講，有騷做就上，冇騷做就閃，仲經常因為唔夠法定人數要「流會」添。

仲有吖，立法會近年不時引用特權法呢把尚方寶劍，成立好多專責委員會，但議員自己就頻頻甩底。好似調查雷曼迷債同梁展文事件兩個委員會咁，出席率低到離譜，有議員差唔多七成會議都唔見人。

議事堂變咗「口水堂」，議員一味做騷「抽水」唔做嘢，有着數就攞到盡，咁樣嘅民意機構，叫市民點信得過吖。唔該「尊貴」嘅議員好好反省，多啲諗吓投你哋一票嘅選民，咪淨係顧住第日點樣歎世界啦。叮！