到底邊個咁大整蠱，幫康文署整個咁大嘅化糞池？救生員人手咁緊張，得閒死唔得閒病，相信唔會有時間踎喺池邊加料，咁就一定係有屎魔泳客出沒啦！

小弟建議立即喺泳池四周安裝天眼，一見到有人掹住池邊長期處於靜止狀態，繼而瞇埋眼打個冷震，唔使審，實係佢放菌都得嘞！

網友回應...X）...

[　蛇王余　]

打死都唔去泳池游啦，個個池都有便溺，真係無公德。

[　小肥　]

我就寧願喺大海畀鯊魚咬，都唔想喺屎水中暢泳！

[　史撈人　]

小弟建議康文署改行耕田，咁多免費糞池，唔種有機菜真係嘥料。嗱！呢啲咪叫創意工業囉，唔係「屎橋」嚟㗎！

[　小肥　]

其實唔止泳池污糟，好多沙灘都一樣滿布浮金，有次試過浮出水面，眼前唔夠一米有舊喺度，差啲撞到正。

[　洪七公　]

呢啲咪叫做一啖氯氣一啖X囉！污糟到乞兒都怕怕！

[　小黑　]

依家啲泳池名副其實污糟過舊時（屎）！掉康文署署長落去游就差唔多。

[　小博士　]

所謂知己知彼，看來有必要增設一個專門小組，研究一下水中出恭的技術性障礙！

[　婷婷　]

諗起都核突，乾曬唔落水算喇，香港連海灘泳池都咁污糟，不如唔好叫美食天堂，叫國際化糞大都會啦！