立法會放暑假，政黨都少咗活動，不過私底下嘅較量冇停過。富貴黨前主席田北俊日前開到口話個黨依家得番三個立法會議員，分工出現困難，仲暗示歡迎幾位退咗黨嘅黨員歸隊，不過啱啱搞咗檔經濟動力嘅3L召集人Jeffrey林健鋒就反制對方，話經濟動力都歡迎人加入。佢哋咁樣算唔算鬥拋呢？
Jeffrey日前出席一個場合時，被問到有冇可能返富貴黨，佢滋油淡定咁叉開話題，答咗句：「我哋都好歡迎任何人加入！」畀咗個閉門羹田少食。富貴黨主席劉健儀被問到係咪招攬舊員時，強調從來都冇話唔畀離開咗嘅黨員歸隊，依家亦有同3L合作。不過，佢都補充，個人唔着重任何意識形態嘅合作方法，最重要都係搞番好香港嘅經濟喎。
講番Jeffrey佢哋嗰檔經濟動力歡迎人加入，我哋追問佢會唔會吸納畀富貴黨踢走嘅全國政協李大壯呢？Jeffrey好玄咁話佢好支持和平統一喎！呢個答案真係要意會至得。喺同一場合嘅李大壯就話，啱啱喺外國返嚟，乜嘢入黨嘅消息都收唔到，仲重申自己無黨無派，咁即係邊度都唔會去啦！