02/08/2009

播放本新聞相關短片

政情:甘乃威差啲畢唔到業

雷曼迷債賠償方案出籠後,跟開案件嘅立法會議員都幾難放暑假,議會新丁甘乃威憑呢件事打出名堂,梗係更肉緊。甘威依家攻讀緊浸大開嘅公共行政管理碩士課程,希望提升議政質素,其中兩份功課原本預咗上月二十六號前起貨,點知中途爆出個回購方案,甘威被迫喺當日改為同班雷曼苦主開會,然後翌日禮拜一開始唔食飯唔瞓覺通頂趕工,禮拜二下晝飛車趕返學校交功課,否則分分鐘畢唔到業。

講開又講,甘威話課程嘅其中一位講師係平機會委員,仲問佢有冇入到政府帳目委員會,如果有就請佢手下留情,不過佢相信對方純粹係搞Gag,否則等於向佢施壓;再加上帳委會已就平機會醜聞發表報告,呢件事唔會影響佢加入帳委會嘅決定。翻查資料,平機會委員趙其琨同羅觀翠都喺浸大教書,唔知係邊個開啲咁嘅玩笑呢?

直擊人類豬流感最新疫情
詳情瀏覽on.cc《奪命流感》