02/08/2009

播放本新聞相關短片

政情:葉澍堃推介星洲美食

前高官退休後各自各精彩,有啲高官樂於入政壇、評時事,亦有啲高官全情逍遙人生,好似前經濟發展及勞工局局長葉澍堃咁,退休之後成日見到佢入馬場、講飲講食,連飲食業嘅專業盛事都搵佢參與,可見佢已經變咗半個食神。

葉澍堃唔單止鍾意食,仲鍾意學煮,最近佢去咗趟新加坡,講起星洲美食時,佢興致勃勃咁推介牛車水附近嘅發記潮州菜館同唐人街Maxwell Food Court Market入面嘅天天海南雞飯,話食完豎起拇指讚不絕口。佢指發記至今已經係第三代經營,菜式多以古法炮製,例如蒸䱽魚咁,會加水、酸梅、鹹欖、唐蒿,蒸七分鐘,䱽魚出奇地鮮味,而水就變成好靚嘅上湯,從未試過咁好食。

至於天天海南雞飯,葉澍堃更形容係「正到痹」,唔講得笑。佢話雞肉、雞湯同飯粒都好入味,雞滑飯香,令人回味無窮,但只係賣三蚊坡紙,大概港幣十六元,簡直抵到爛。

直擊人類豬流感最新疫情
詳情瀏覽on.cc《奪命流感》