港府委任社會人士出任公職出現微妙變化，由於政圈青黃不接，繼多咗傳統左派成為諮詢機構成員外，名人二代亦係另一群新人類。過去兩日，多個名人二代都收到委任書，計有恒基四叔嘅大仔兼百仁基金會主席李家傑，同前全國人大常委曾憲梓嘅二仔曾智雄等。
政府尋日公布委任李家傑做粵劇發展基金顧問委員會成員，身兼香港青聯副主席嘅曾智雄就獲任為博彩及獎券事務委員成員。另一位愛國商人葉樹林嘅愛子、香港青聯常務副主席葉振都亦係另一個博彩及獎券事務委員成員。
其實過去兩個月已經有好多名人二代有公職做，李家傑同曾智雄獲委任做太平紳士，前港區人大代表黃保欣嘅囝囝、廠商會副主席黃友嘉做咗土地及建設諮詢委員會成員，「米業大王」唐學元嘅愛子、廣東社團總會商務委員會主任唐大威就做咗語常會委員，大興紡織創辦人陳元鉅嘅兩個仔、工總主席陳鎮仁同青聯副主席陳仲尼，亦分別做咗生產力促進局主席同數碼港董事局成員。