豬流感襲港後，衞生署衞生防護中心總監曾浩輝成為最有人氣嘅醫療高官之一，但都因此忙到暈，早排日日四三○開記者會，近排又輪住講打防疫針，尋日係周末，但佢朝早八點已經出席電台節目，到晏晝又傳出香港再有第三個豬流感死者。不過，曾浩輝忙歸忙，都有抽時間去逛動漫節。
尋日下晝兩點幾，我哋見到人潮如鯽嘅動漫節中，有個好熟悉嘅面孔，睇真啲，原來係曾浩輝，只見佢一身便服手挽一袋戰利品，邊行邊展示兩件戰利品，一樣係手提遊戲機，另一樣係迪士尼電影《太空奇兵．威E》主角威Ｅ的模型，講嘢時仲笑到見牙唔見眼嘅樣。
曾浩輝透露，佢係一個動漫迷，平時咩漫畫都睇，好似愛情、推理類漫畫等。真係估唔到平時斯斯文文兼未婚嘅佢會係動漫迷。