02/08/2009

播放本新聞相關短片

政情:林煥光向孫公偷師

曾做過特首辦主任嘅林煥光日前開腔批評政府後,近日又接受訪問,卸下公職後,佢為人都放啲,唔介意講當年嘅事,除咗繼續強調為政者要謙虛外,佢仲透露喺官場三十載閱人無數,教育局局長孫明揚係佢佩服嘅一個。

林煥光坦言,孫公過去處理過唔少棘手政策,但至今行出嚟嘅神情仲好瀟灑。佢憶述,七十年代地政專員去新界收地,要有心理準備畀人淋屎,事關新界人不滿政府賤價收地,再以高價出售圖利,但當年搞地政嘅孫公三扒兩撥就同鄉議局達成收地賠償機制,當時喺環境科任職嘅林煥光就從中偷師,學咗啲乜嘢,林煥光就冇交代嘞。

佢跟住又強調,官員去立法會經常畀議員鬧,唔應該因此感覺冤屈,諗深一層,真正掌權嘅係政府同官員,而執政者大不了只係被人挑戰;相反,如果政府要運用權力踩一個冇權嘅人,後果可以杰撻撻。

直擊人類豬流感最新疫情
詳情瀏覽on.cc《奪命流感》