陳維安尋日出席一個青少年設計活動做頒獎嘉賓，致詞時佢借參觀場內展品作比喻，話自己好鍾意一個吊喺半空、有翼嘅盒嘅設計，不過，呢隻盒嘅下方有繩拉住，令隻盒飛唔起，作品似乎係要表達想飛嘅理想會畀現實掣肘，佢跟住將話題帶到理想同現實上。

佢話，有時學生創作或者從事創作時未必會得到認同，但年輕人唔應該畀上一代或者社會嘅實際思想規範住，最緊要係「活在當下」，仲要保持一份熱誠，因為熱誠幾時都好有用喎！佢呢番話明顯係講追求理想會面臨掣肘，要繼續追求嘅話，就只能以「活在當下」嘅豁達同高度熱誠嚟推動。

太太拖累備受批評

陳維安講嘅時候好投入，似乎有感而發，或者出任副局一年後，佢都喺理想同現實中被折磨，所以感同身受啩！呢一年入面，佢嘅表現未獲好評，更因為太太喺豬流感肆虐之際，要求學校為囝囝搞小學畢業禮而備受批評，如果唔識得「活在當下」同「保持熱誠」扮阿Q，睇怕都未必捱得住！

頒獎之後，陳維安講到囝囝因為豬流感取消咗小學畢業禮一事，話囝囝好失望，所以佢計劃遲啲抽時間帶囝囝去旅行補數。