港大民意研究計劃最新調查顯示，雖然八個副局長有七個嘅認知率比四月初稍微上升，至弊有人識唔等於有政績，可能只係因為負面新聞夠搶眼。好似商務及經濟發展局同教育局嘅兩個副局長咁，認知率分別係百分之三點一同百分之二，不過係人都記得，佢哋先後因為名片醜聞同畢業禮風波而街知巷聞。

講到九個政治助理，更加係「黃腫腳，不消提」，有人識嘅只有四個咁大把，剩低嗰五個嘅認知率等於零，即係冇一個受訪者噏得出佢哋姓乜名乜。「零認知」嘅政治助理比對上一次調查仲多兩個，其中民政事務局政治助理更加連續三次調查食鴨蛋。副局政助愈來愈「隱形」，都唔知請嚟做乜。

不過咁，如果話市民對佢哋一啲印象都冇，又唔係噃。呢嗱，教育局副局長陳維安嘅太太被指罔顧豬流感風險同政府嘅停課令，建議個仔間學校組織「私人畢業禮」，畀人踢爆之後，陳維安一味話自己冇參與，想卸責過骨；商務及經濟發展局副局長蘇錦樑更加離譜，用副局長名片代替入息證明，幫菲傭向入境處申請續期留港工作，畀人炳到九彩。唉，呢兩位政治新貴因為鬧出醜聞先至有人識，你話係咪可悲吖！

初來甫到冇人識唔出奇，好似《全英一叮》嗰位靚聲村姑博伊爾咁，初上台睇落又娘又土，但係人哋有真材實料，憑一把天籟歌喉即刻走紅，係人都識。香港班副局政助本身資質已經麻麻，不過係黑箱作業揀出嚟嘅「御林軍」，冇認受性，又冇料到，市民識佢哋係阿茂咩。

港府自己嘅數據都顯示，八個副局長上任一年，平均每人每月出席立法會會議只得一點六次，出席區議會同其他公開活動更少，人均每月一次都唔夠，直頭隱晒形。就算偶然蒲吓頭，態度又寸，唔係有問不答就係答非所問，唔怪得畀人笑係「不熟悉政策、不到立法會開會同不敢回答問題」嘅「三不」官員。

叮！向議員解釋同推銷政府政策係副局政助最主要嘅職責，但佢哋毫無承擔，卸得就卸，原本負責統籌政策執行嘅正副常秘焗住要做埋佢哋嗰份，兼顧應付議會同傳媒。政府每年使幾千萬公帑請班連本職工作都做唔掂嘅八國聯軍，你話納稅人係咪冤枉吖。

煲呔曾本來諗住請班副局政助嚟擋子彈，依家佢哋子彈擋唔到，仲下下爆大鑊燒埋政府嗰疊，呢鋪真係自己捉蟲，唔衰攞嚟衰咯。點解決？四個字：速速收皮！