有冇咁罪惡呀?
社工組織得閒無事最鍾意搞調查,最近又整咗個青少年上網成癮調查,發現有近一成六青少年上網成癮,比四年前高咗三倍。
好心咁嘅調查結果就唔好拎出嚟啦,依家啲後生仔自出娘胎已經對住部電腦,差啲以為係個CPU生佢出嚟,係個Mon含辛茹苦養大佢,要叫聲阿媽阿爸咁滯,咁嘅世代得一成六青少年上網成癮?咪玩啦!
據維基百科講,一日都係有個叫葛爾.柏格嘅人將網民妖魔化,話上得網多,好易患上「網絡成癮症」,搞到做人冇晒成功感,人際關係又好鬼差,就嚟講到上網會染愛滋、陽痿兼生肺癌添!上網之嘛,使唔使講到咁罪惡呀?
其實一日上網十個八個鐘,即係話至少有十個八個鐘唔索K、唔援交,為人父母嘅,真係要劏雞還神呀!
網友回應
GI Joe
我每日大拿拿都上十幾個鐘網o架喎,上網睇書、搵資料、打機、玩樂,都係好多得有互聯網,好罪惡咩?罪惡得過出去殺人放火打劫索K?
小不點
上網已經係青少年嘅基本動作,唔上會好落後o架!
德仔
點止淨係青少年呀,簡直係人類進化嘅一個里程,互聯網萬歲!
肥仔強
葛爾.柏格一定係上網上得最勁嗰個,唔係點妖化網民吖!
kenken
社工真係為搞而搞,上互聯網已經係一項全球好普遍的大氣候,佢就走去標籤為成癮,又唔見佢整個睇電視成癮同睇戲成癮大調查?嘿!
匿名
罪咩惡吖,遲啲抖氣都犯法呀!一係學大陸咁同啲口靚仔戒網,一上網就電暈佢哋囉!
charis
無得上網先至無癮啦!
版主:小白(@^@)"
銜頭:***
評論員
特徵:***
路見不平,
Blogger相助