動漫節啱啱開鑼就引爆焦點話題，尋日開幕時，更請嚟有眾人媽打之稱嘅前民政事務局常秘李麗娟，媽打仲爆響口，話呢個活動嘅其中一個搞手係凌速博覽有限公司主席劉偉傑，而佢太太就係稅務局局長劉麥懿明，唔怪之得媽打畀面做開幕嘉賓啦。
劉麥懿明老公低調
劉偉傑雖然係大型活動嘅搞手，但就相當低調，攝影師舉機想同佢影番張相，佢都怕怕醜醜咁避鏡頭。
唔講唔知，過去一共十一屆嘅動漫節都係由凌速博覽做籌辦單位，而且每日喺電視見到嘅「宣傳易」分類廣告節目，都係佢哋公司嘅姊妹機構炮製嘅。
媽打尋日出現時，身邊仲有個契女、八仙嶺山火生還者蘇婉珊。蘇婉珊已經大學畢業，暑假做緊媽打助理，幫手搞籌款，媽打笑笑口咁話，呢啲都算係標尾會咯。