暑假開始後，香港就吹起一片禁毒抗毒風，煲呔曾更要親自領導抗毒騷，趁機抽吓水。佢策劃呢場大龍鳳好容易，難為一早預咗喺今個暑假外遊或者陪屋企人嘅官員同下屬，紛紛被迫取消休假返工，當中包括民政事務總署署長陳甘美華。
煲呔曾部署失當
煲呔曾早前下令撥款九百萬元，畀十八區民政事務處大搞「青少年反吸毒社區計劃」，原意係想盡快搞多啲社區文康同教育宣傳活動畀啲後生仔參與，可惜佢喺暑假宣布，政府內部都未做好諮詢同部署，就爆出十八區民政專員有三分一都放晒暑假嘅鬧劇，結果有部分正在休假嘅民政專員要急急返工接波。
由六月中至七月底分三次放足差唔多成個月大假嘅陳甘美華係民政總署阿頭，佢嘅缺陣會令十八區民政處群龍無首，結果陳太最後都決定取消原定喺七月下旬嘅假期，提早返嚟做抗毒騷。