立法會議員「象哥」黃定光係出口界嘅立會代表，我哋早前披露象哥諗住做埋呢屆立法會後唔角逐連任，仲選定已故立法會議員許長青嘅公子許華傑同新任香港青年聯會主席陳仲尼做接班人，尋日佢出席所屬政黨嘅籌款晚會時，親口證實所言非虛。
象哥話自己六十有多，係時候退下來，交棒畀年輕人。佢又話，依家距離下一屆選舉仲有三年，佢已準備帶埋兩位接班人多啲同商會、業界見面，等佢哋做好準備。至於最後邊個跑出，象哥就話由業界同選民話事。
同場仲有今日正式履新做特首辦主任嘅譚志源（Raymond），佢話由於辦公室由政府總部轉咗去禮賓府，今日會返新辦公室收拾文件，將啲畫同盆栽安頓好，禮拜一正式開工。