行政會議召集人梁振英（CY）係下一屆特首競猜遊戲嘅熱門，近期佢動作多多，除寫網誌、寫文章外，連電視嘅煮食節目都玩埋，擺明谷人氣、爭民望。尋日CY又見報喇，今次佢揀喺份報紙撰文，講內地高考披露嘅官場腐敗、社會風氣日下，個話題同佢嘅行會身份、甚至一般港人嘅感覺都離行離列，似乎CY講東講西都要谷知名度噃！
尋日佢喺一份報章撰文寫內地高考作弊風，講到好多貪官污吏喺高考中作弊時，佢好激昂咁以香港為例，認為一個社會嘅正確價值觀對民心向背、港台兩地民心回歸有決定性影響，勉強將話題同香港拉上關係。
講起CY谷人氣，真係不得不寫個服字，佢雖然從政多年，但過去只會喺房屋、政治議題上見得到佢嘅意見，直至舊年下半年開始，佢先開始喺其他界別活躍起嚟，唔單止成日更新網誌，仲連最低工資呢啲議題都爭住發言，早前又以好男人形象出席埋煮食節目，佢嘅起跑部署似乎比起其他競猜遊戲嘅對手快好多。不過，講東講西雖然幫佢谷咗人氣，但唔代表谷到民望，日前大學做嘅調查就發現CY知名度雖然急升，但民望仍下跌，可見佢應該檢討吓催谷手法。