事前準備不足

有議員指出，行管會每屆都會預留約五十萬元畀聯絡小組外訪，不過，有關開支上限早喺十年前定落，而且去乜嘢地區同國家都係同一個價錢，實在有檢討嘅必要。好似今次佢哋去東歐三國克羅地亞、捷克同匈牙利訪問，就難免有超支危機。搞出大頭佛嘅禍源之一，就係尊貴嘅議員事前準備工夫不足。

佢哋出訪嘅東歐三國，當地好多政界人士都唔識英文，反而德文同俄文仲多啲人識。不過由於三個國家都受過前納粹德國同前蘇聯欺壓，好抗拒用德文或俄文溝通，考察團如果齋請一名德文或俄文翻譯，分分鐘會引起外交風波，最後惟有去到每一個國家都喺當地聘請一名翻譯，所以行政開支咪面臨爆煲囉。

有份外訪嘅議員話，團友早前已一致決定，如果考察團嘅機票食宿開支超標，佢哋會自掏腰包夾番畀立法會。

雖然個團可能要夾錢收場，但都好受歡迎，早前有議員臨時決定退出後，後補抽籤由會計界陳茂波脫穎而出，而本來決定自費報團嘅聯絡小組主席石禮謙就再次抽籤失利，最後決定退出唔玩。

希望佢哋今次真係計清啲數，唔好臨尾又甩轆喇。