到底領匯有幾不義，相信大家都聽得唔少。而故事嘅最新進展係，今日領匯舉行股東周年大會，又有大批關注團體計劃拉大隊去踩場抗議，其中一個監察團體力數領匯管理七宗罪，包括喺金融海嘯之下瘋狂加租啦、逼到小商戶走投無路啦、加重基層市民負擔啦……

數吓數吓，太一叮都數到一肚火。就攞嗰個逆市加租嚟講呀，有關注團體透露，過去一年續約嘅商戶唔少都要加租二至七成。咁仲不特止，領匯仲要巧立啲貴價管理費、營業額提成嘅名目，將啲小商戶榨乾榨淨。太一叮聽講有間屋邨錶行，早前畀領匯逼佢租個大一倍嘅舖位，月租由八千蚊加到三萬二千蚊，足足貴咗三倍。卒之，錶行老闆拉閘離場，邨民望住個空寥寥嘅領匯舖位，可能要含住欖核講句：錶你有冇？

領匯加租加到豬籠入水，咁啲員工咪過水濕腳，有福同享咯？咁又唔係噃。等太一叮話你知啦，領匯大賺特賺之餘，仲要同外判公司夾手夾腳，將旗下保安員由三更制改成兩更制，一邊大刀裁員製造失業，一邊加長工時變相減薪。嗱，領匯嘅最新業績大家未知，但舊年狂賺十八億就路人皆知，喺咁嘅情況下都仲要刻薄員工，豈只不義而富，簡直係為富不仁！

後來喺輿論壓力下，領匯終於承諾恢復三更制。殊不知，呢頭講完，嗰頭就有外判公司照樣轉兩更制，太一叮見到嘅係，利字擺中間，信字放兩旁，原來食言，真係會肥嘅。

領匯吸水無所不用其極，咁服務水平有冇提升？對唔住，係冇嘅。近日有團體訪問咗四百幾個車主，超過六成人認為領匯停車場租金同所提供嘅服務不相稱，譬如失驚無神爆吓水管啦，間中有賊仔入嚟爆吓你架車啦，更離譜嘅係，有人喺梯間便溺搞到臭氣熏天，而領匯竟然唔理。

叮！領匯上市至今，已經寫出一篇長爆長有嘅臭史，而當年推動領匯上市嘅特衰政府，竟然可以匿埋一邊。按理講，領匯雖然係上市公司，但佢管理嘅物業多數都喺公共屋邨，同政府有斬唔斷嘅關係。但幾年嚟，市民只見領匯一手趕絕商戶，一手剝削員工，搞到社會怨聲沸騰，而政府竟然話係「商業決定」，一概不瞅不理。

更不幸嘅係，因為領匯唯利是圖，已經搞到一位商戶代表跳樓死控！據知，呢位商人喺樂富中心經營茶餐廳，○六年中心大翻新時，曾經代表商戶同領匯交涉，獲承諾唔會大幅加租，點知今年商場重開，領匯竟然違反承諾，畀商戶批評租金太貴。呢位商戶代表懷疑愧對街坊，竟喺屋企跳樓自殺，佢太太話：「借呢件事，想叫領匯唔好再迫害我哋！」

面對呢句血淋淋嘅控訴，領匯依舊我行我素。尋日有組織批評領匯借翻新商場趕走小商戶，領匯嘅回應竟然又係嗰句：「租金係按唔同舖位嘅市場水平釐定。」總之利字當頭，任何道義責任一概免談。可見領匯為富不仁，已到咗冥頑不靈嘅地步，激起嘅民怨亦愈來愈勁，政府繼續坐視不理，遲早引火燒身。所以呢，太一叮決定將政府同領匯綁埋一齊，起勢叮爆佢哋，叮！