「賣肉養天王」聽到毛管戙

少女援交成風，原來援交男都有後來居上嘅趨勢，有啲麻甩仔話為咗交補習學費致下海，「賣肉養孤兒」就話賺人熱淚啫，依家連「賣肉養補習天王」都有，試想想，嗰啲乜Sir物Sir年薪千萬，哎呀，原來全部都係中華援交兒女嘅皮肉錢，聽到都毛管戙。

幸好，有啲個案比較冇咁造作，有個講到明嫌暑期工時薪奀，得嗰二十一蚊，點夠使呀？咁又係呀，索K唱K吓吓要錢，所以男女唔拘，來者不拒，睇怕平機會要頒個男女平等獎畀佢哋至得。

不過呢班口靚仔如果真係有志喺呢行繼續發展，書唔讀唔緊要，唔該都睇吓日劇進修一下吖，狂煲嗰套《王牌男公關》向日本人學吓嘢啦，今時今日，多一條經濟支柱得一條呀。

網友回應

阿shan

有供必有求，援交男都唔出奇吖，可能仲勁過援交女。

小寶

睇怕遲啲書展唔輪到G模响度賣肉囉，援交日記至殺晒。

小肥

waaa，咁同做鴨有咩分別，鴨業年輕化，呢個亂攤子世界，學生一出來就做鴨喎，大學都要開一個新嘅援交學系，來適應市場啦，唔係邊有得做，邊個仲會報乜乜經濟系、市場系吖，做鴨都夠搵食。

彤

我就話佢哋唔係為交學費啦，依家津貼中學都只係要交幾百蚊堂費咋嗎，我覺得佢哋係睇中咗某個名牌包包或者最新款手提電話，先貪「方便」短時間搵錢。援交男女都一樣，如果真係為咗交學費，放學份part-time都okey啦！

匿名

成班鹹濕仔，以為有得食有得拎，遲早撞板。

sze

為交學費走去援交，政府點搞呀，依家啲津貼補助好唔夠咩。

安安

有無本相簿睇吓先？最好名碼實價列明，如果唔係就唔算平等喇！

小欣

需求與供給，你情我願，其實啱晒市場，援交問題一直根深柢固，依家年輕人物質為先，其實係社會急要解決嘅問題。

不過，整個香港社會其實同時間已經改變咗，讀書唔再着重品行，返工唔再着重良心，咁樣嘅情況，大家都只覺得功名同錢重要，下一代亦唔會覺得自己個身體係重要，佢哋都只會貪榮，根本就係成個香港社會發展出嚟嘅風氣。

一個全新的報上部落格，每日與你暢談社會至Hit話題，剖析問題所在。

網址：www.sunsiupak.blogspot.com

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。