29/07/2009

播放本新聞相關短片

政情:Rita急Call補鑊議員收貨

商務及經濟發展局做嘢唔係歎慢板就係開快車,最新鮮熱辣嘅係《電訊(修訂)條例草案》,激到立法會資訊科技及廣播事務委員會副主席李永達同委員劉慧卿彈起,前日要召開記者會炮轟局長Rita劉吳惠蘭繞過正常程序,未經該委員會「過河冷」就將條草案提上立法會首讀。

商務局當日已即晚發出新聞稿澄清,身在江西贛州訪問嘅Rita尋日親自打長途電話畀高達同卿姐補鑊,解釋佢絕對無意繞過立法會程序,如果委員會想討論草案內容,佢樂意盡快安排,最快下星期二開到會,兩人勉強收貨。

有議員就私下表示,Rita成日撞板主因係商務局嘅政策範疇太雜太廣,好多仲係積壓多年嘅政治地雷,Rita起碼做錯嘢都肯認,好過好多死不認錯同賴皮嘅問責局長。

直擊人類豬流感最新疫情
詳情瀏覽on.cc《奪命流感》