29/07/2009

播放本新聞相關短片

政情:熊市定牛市 阿Ron頭擰擰

近日熱錢瘋狂湧入股市,港股三扒兩撥突破二萬點,唔少股票更熱炒「經濟復甦概念」,再度鹹魚翻生。有股市大好友更聲言,牛市已重臨。後市係咪真係咁好景?

尋日晏晝喺中環遇見港交所主席阿Ron夏佳理,捉住佢追問股市去向。阿Ron分析近日股市升到你唔信嘅原因,全因「錢多」作怪。佢話,市場陸續傳出好消息,個市自然借勢炒高。港股重拾牛氣當然可喜可賀,但睇番外圍經濟環境其實依然五勞七傷,至於香港本身更加係失業率高企,打工仔飯碗不保。言下之意,股市依家只係一陣虛火。

到底港股仲有冇再升空間,抑或應該趁高沽貨離場?後市究竟會係熊市定係牛市?阿Ron頭擰擰話:「我真係唔識睇喎!」

縱橫股場多年,經歷幾番股災,但講到當前市況,連佢都話睇唔通,睇怕小股民要小心啦!

直擊人類豬流感最新疫情
詳情瀏覽on.cc《奪命流感》