29/07/2009

播放本新聞相關短片

政情:會展玻璃碎製小飾物

喺上星期三出席過會展中庭擴建落成儀式嘅嘉賓,尋日收到貿發局一份禮盒,裏面有一隻介紹會展擴建工程嘅CD同小冊子,而最古怪嘅係有一個鎖匙扣,驟眼睇嚟,匙扣吊墜毫不起眼,似玻璃又似透明塑膠,藍藍綠綠,手工仲有啲粗糙添,有啲古怪喎!

貿發局都估到大家有疑問,所以喺鎖匙扣上掛住個小紙牌,解釋呢件小飾物嘅來頭,係由會展中庭擴建時拆卸出嚟嘅玻璃幕牆碎片製成,總共有一千個咁多,畀大家留個紀念。

原來係咁,專登保留呢份原始粗糙感覺,舊舊形狀都唔同,獨一無二。會展呢招廢物利用都好有心思,其他公營機構不妨參考吓。

直擊人類豬流感最新疫情
詳情瀏覽on.cc《奪命流感》