早幾日踢爆財爺鬍鬚曾出陰招，透過手下游說班建制派議員反對立法會財經事務委員會召開特別會議，討論佢欽點煲呔曾家臣攞命陳接任金管局總裁嘅醜聞。
單嘢尋日終於有結果，反對開會嘅議員多過贊成嘅議員，委員會主席「橄欖」陳鑑林於是拍板決定唔開會，令鬍鬚曾逃過被公審一劫。班「反曾」議員插唔到鬍鬚曾，就將矛頭轉向橄欖，質疑冇理由因為部分人唔得閒或唔想開會，就剝奪其他委員嘅開會權利。佢哋又認為橄欖只應詢問議員有邊日得閒或唔得閒，冇理由問人需唔需要開會，令人懷疑佢偏幫政府，簡直就係赤膊上陣幫鬍鬚曾擋箭。
有議員就表明會喺十月復會後再次要求開會，傳召鬍鬚曾同到時已經上咗任嘅攞命陳一齊上嚟受靶，甚至連橄欖都一併審埋。