前教統局常秘羅范椒芬喺報章提及申請做東華三院份工遭拒時，字裏行間仍透出火氣，而一向係謙謙君子嘅前衞生福利局副局長何永謙突然跳出台前，喺電視台節目中為公務員出頭，仲提及羅范單嘢。究竟係咁啱得咁蹺抑或係約埋唱雙簧？

何永謙直指問題唔係出喺管制期長短，而係審批嘅官員判斷犯錯，而審批委員會亦冇做好把關工作，所以檢討委員會建議會令公務員覺得政府犯錯，要佢哋孭鑊，影響士氣。

點醒要顧全大局

轉頭佢又辣埋高官問責制，指問責制冇旋轉門制度，令好多有能力嘅公務員裹足不前，又踩外聘引入嘅問責官員表現又唔見突出，但薪酬比公務員高好多，又唔使受收緊冷河期約束，公務員一定唔服氣。跟住佢仲批評審批當局拿捏嘅準則經常出現偏差，又攞番羅范單嘢出嚟講，直指當事人一定唔服氣。

佢直指喪失長俸制而又經常捱批嘅公務員隊伍，已經唔一定能夠引能者加入，而政黨制度全面發展前，公務員隊伍始終係培訓政治人才嘅場地，希望政府懂得珍惜，仲話若要防範延取報酬嘅猜疑，政府大可開宗明義，曾參加商談商業利益工作，唔想佢哋加入相關財團任職，有人堅持咁做，就不論離職年期長短都要特別申請，唔需要一刀切延長管制期。最後佢仲點醒當權者，公共政策要顧存公眾利益，亦要顧全大局。

喺為官時，呢班前高官乜都唔講得，離開官場後就狂轟政府，尤其今次檢討報告啲建議根本唔影響到佢哋，仍然忍唔住要出嚟鬧鑊勁，可想而知在職嘅公務員肯定谷到爆。

當年老董搞唔掂班公務員，腳痛落台，阿爺搵煲呔曾就係以夷制夷，駕馭班公務員，何永謙嗰句要顧全大局，好明顯就係警告煲呔曾，咪下下向公務員開刀，若果逼到公務員作反，冇人救到佢。