事實上，被告同埋死者都係受濫藥禍害嘅後生仔女，正如警方所講，確係一個悲劇。係人都知依家青少年濫藥問題一發不可收拾，佢哋人仔細細，已經將濫藥當食煙飲酒一樣，隨時隨地想索K就索K。

唔係嚇大家呀，曾經有調查發現，最細嘅索K個案你估係幾歲呀？答案認真得人驚，原來只係得七歲咋！你話幾時索到大吖，叮，真係世風日下！

查實青少年濫藥問題咁嚴重，已經唔係今時今日至爆發，當局喺幾年前已經咁講啦，但你知啦，呢個政府得兩樣嘢叻，一係「拖得就拖」，二係「卸得就卸」，結果拖到依家，始終睇唔到有任何解決方案。

奇就奇在，當局一直闊佬懶理，到依家後生仔索K成風嘅時候，至施施然行出嚟話問題比想像中大，推出嘅所謂一系列措施，要喺社會動員、社區支援、測檢、康復以及執法等方面打擊青少年濫藥，至於成效有幾多？唔使多講，大家心照啦。

記憶猶新，沙士之後咪試過搞全城清潔運動，搞咗咁多年，成效係點呀？試吓去橫街後巷望望，咪又係一樣咁污糟邋遢。難怪呢個「反濫藥運動」一出籠，即刻被人狂轟係炒冷飯冇新意啦！

先講嗰個比較具體些少嘅校本自願驗毒計劃吖，新學年率先喺大埔區中學試行，最快年底幫首批學生檢驗，問題係，對於十六歲以上學生係咪有權拒絕、仲有涉及人權以及私隱相關問題，港府好似諗都未諗過咁。

至於話社區支援，更加係得啖笑，唔該睇吓正生書院遷去梅窩事件吖，咁簡單嘅遷校問題都搞到滿城風雨，引發社會矛盾。好嘞，大吉利是講句，到時有大量學生被驗出濫藥嗰時仲大劑，知唔知大埔區只有一間社區中心咁大把，點支援得咁多？

事實上，青少年濫藥同豬流感一樣，屬於高傳染性，好多後生仔都係受到朋輩影響，把持不定至開始濫藥，正所謂「預防勝於治療」，單靠社區支援有鬼用咩！

依家啲學生哥要買到K仔，簡直易如反掌，歸根究柢，完全係警方過去忽視學校濫藥問題，再加上執法當局太過鬆懈，既冇具體方案打擊堵截毒品源頭，又冇加重相關罰則，先至搞到濫藥成風。

唔好畀太一叮睇死，打擊青少年濫藥最終只是一場騷，連當局都承認「摸着石頭過河」，證明已經係投晒降啦。見一個救一個喎，見到成班懶官等運到靠害下一代，係人都想見一個叮一個就真！