雷曼迷債回購方案嘅談判相當迂迴，財經事務及庫務局副局長Julia梁鳳儀，連月嚟喺證監同銀行之間斡旋。為應付呢場拉鋸戰，聽聞佢曾許諾，聲言傾唔掂數就連假都唔放。佢咁講唔知係想激勵自己吖，定係想畀啲壓力下屬，等大家快手快腳喺暑假前搞掂回購方案呢？
隨住回購方案上個禮拜出爐，佢終於有假放，下個月底會去英國，皆因佢要盡母親責任，陪小朋友去英國開學。
雖然搞掂咗雷曼回購方案呢個燙手山芋，但係金融海嘯第二波唔知幾時又殺到，睇怕一眾財金高官都係唔好開心得太早，否則又掉以輕心，搞到倒瀉籮蟹嘅話，實聽畀市民鬧鑊甘。