一年一度嘅賣旗活動係東華嘅「生招牌」，李主席話舊年賣旗日遇着打風都籌到幾百萬元，可見東華支旗有一定捧場客。可惜今年唔夠運，抽籤落空，惟有急急補飛，終以「籌款承諾機制」向社署攞到一日檔期，喺八月五號上晝八點至中午十二點，半日內要「撲水」五百萬元，佢話會出動人海戰術，務求「跑夠數」。

李主席又慨嘆時下後生仔對東華認識唔深，較少捐錢畀佢哋，就連東華搞活動都吸引唔到年輕人。佢舉例話，東華上禮拜喺某商場搞活動，呼籲人關注柏金遜症，但場面冷冷清清，反而同場有班o靚模搞宣傳活動，三扒兩撥就吸引大批o靚仔捧場。

估唔到東華招牌咁猛料都敵唔過o靚模，為今之計，睇怕李主席要攝高枕頭，度橋搶o靚仔客嘞。