援交問題嚴重，究竟何謂「援交」？連商務及經濟發展局前局長馬時亨都被考起。肥亨尋日客串做電台節目主持，自爆佢呢輩成熟嘅人，以前根本唔識乜嘢叫「援交」，一直只當喺互聯網上結識網友，後來向朋友求教，先得知「援交」一詞源於日本，唔係識朋友咁簡單，好多時涉及金錢上嘅性交易。
發生十六歲援交少女被殺害後遭肢解悲劇，係虔誠基督徒嘅肥亨話感到震驚同痛心，指援交問題咁嚴重，主要關乎青少年過分追求物質，以援交賺錢。對於時下家長要搵食無暇照顧子女，佢話：「回想成長時，我媽媽一日做十五至十六個鐘，返完工廠，仲要幫人挑褲腳，但我哋成長都冇學壞，就係因為阿媽經常灌輸正確觀念。」
佢認為治本嘅方法係由家長向子女灌輸正確嘅道德價值觀，亦相信冇一個父母想自己個女去賣淫或變壞，而學校道德教育亦好重要。