依家海洋公園仲考慮緊會唔會押後加價，但門券加價兩成，畀外界狂轟係向小市民開刀。以前成日帶囝囝去海洋公園玩嘅協成行集團副董事總經理方文雄話，喺營商角度嚟講，加價係可以接受嘅，但加幅太大會令基層市民負擔唔起，於是佢諗咗條好橋送畀海洋公園。
方文雄建議海洋公園可以搵慈善團體贊助經費，每個禮拜或每月設立一日「特惠日」，畀低收入人士購買廉價門券入場，而其他日子就照常加價，相信會係一個雙贏方案。
由於兩個仔都大個仔嘞，近年好少去海洋公園，方文雄反而鍾意同佢哋去行山，等佢哋唔好成日掛住上網同打遊機喎！佢仲話行山一來唔使錢，二來空氣清新令身體健康，而一邊行山，一邊可以同兩個仔溝通多啲，增進感情，可謂一舉幾得。