梁高美懿上場做恒生銀行「一姐」後，為加強同員工溝通，喺公司內聯網整咗個CEO Blog，大爆私生活同個人感受，近日就講佢豐富嘅外遊經歷，其中兩張相隔超過十年嘅旅遊照片，相中人幾乎完全冇老過，顯示佢除識得做「賓架」外，養顏護膚亦有一手。
梁太喺網誌中透露，讀初中時第一次跟屋企人去台灣旅行，婚後亦經常舉家外遊，幾乎全世界都去勻。當中印象最深嘅係九十年代初第一次坐郵輪歐遊，去咗荷蘭、德國、英國、法國同意大利；新西蘭、瑞士、加拿大同內地佢都好鍾意去；但講到最喜愛嘅，始終係佢喺當地打過工、陪囡囡一齊成長嘅澳洲。
