尋日有議員大鑼大鼓開記招，炮轟政府靜雞雞推出草案，連立法會資訊科技及廣播事務委員會副主席都被蒙在鼓裏，跟住仲加多一腳，大鬧條草案唔單止冇諮詢過立法會，連市民都冇諮詢過，究竟係咪又一次黑箱作業呢？

雖然冇明文規定，所有草案或者撥款建議都一定要上立法會相關事務委員會過冷河，但呢個做法已經成為立法會嘅慣例。今個月初，商務及經濟發展局局長Rita劉吳惠蘭想立法會批錢擴建迪士尼，點知搞出項「神秘議程」之餘，仲要立法會傾咗十一日就批錢，咪畀議員鬧到狗血淋頭囉！

或扯埋其他局長落水

有議員話，其實唔少局長都好識做，唔需要議員扯晒火先就範。不過經Rita手嘅嘢，唔少都惹人非議，隨手數就有近日再炒熱嘅香港電台問題，公共廣播服務檢討份報告兩年前已出爐，但依家都冇聲氣；仲有講好本立法年度交草案嘅公平競爭法，到依家立法會放暑假都唔見影；而被批評得體無完膚嘅《淫褻及不雅物品管制條例》只係做咗首輪諮詢。

加上今次《電訊條例》又趁立法會抖暑先交上嚟，議員當然咬住唔放，話整封信畀立法會內務委員會投訴，實行狙擊Rita，仲要扯埋其他局長落水，要立法會秘書處數吓政府試過幾多次冇過冷河。其實Rita事前同議員單聲咪乜事都冇囉，搞成咁咪自己攞嚟衰，仲可能累埋街坊喎！

商務及經濟發展局亦急急發聲明，強調草案加入嘅準則全部都唔係全新條文，只係引用現行嘅行政指引，又話相信畀議員喺草案委員會討論係最直接嘅方法，期望討論喺暑假後展開，有需要嘅話，政府好樂意依家就向議員講解草案喎。