丁啟泰的父親丁其才早前接受本報專訪時說：「阿泰雖然脾氣差啲，但本性純良，我唔相信佢會變成冇人性！」他永遠記着愛子最好一面：「佢細個嗰陣唔畀人殺小昆蟲，佢連曱甴都話唔好踩死，我唔信佢會變成依家咁！我成日諗會唔會係第二啲人做？我好無奈，好迷惑。」
丁父指以往常叮囑阿泰行正路：「我叫佢帶眼識人，唔好識埋啲壞人，佢次次都話得(口架)啦，我知啦！」而阿泰亦曾向他承諾：「老竇，我想學一門手藝，最想學揸車，但佢一路都冇考到牌。」
根據丁父的披露，阿泰身世亦算可憐，五歲時一家遇車禍親睹母親離世，而阿泰亦撞傷了頭部，自此情緒出現問題，八歲時因經常欺凌同學而需接受精神評估，看過精神科醫生。丁父後來再娶，不過阿泰曾在庭上供稱，繼母待他不錯。阿泰十五歲時已因打傷人而被判入男童院一年，唸至中一便輟學。案情披露，阿泰亦於當年開始吸毒，又自稱愛嫖妓，在朋友眼中，其脾氣古怪，時深沉時失控，稍有不順意就亂掟東西。
借財仔六萬 一個月花光
○二年，十七歲的阿泰在南山邨大牌檔做雜工送外賣，月入四千多元，但只做了半年。大牌檔東主憶起，當年阿泰染金毛，花名「肥仔泰」，年紀輕輕已常吹噓「嫖妓戰績」，亦見過他因錢銀問題同人爭執。
○五年，阿泰與表弟到地盤做冷氣工程學徒。他的舊同事冷氣師傅稱，阿泰當年比現在還要肥，最深印象是他愛吹噓、愛炫耀：「佢成日都諗住不勞而獲，最慘係跟住班地盤佬成日北上吃喝嫖妓，又索K吸毒，結果搞到唔夠使。」
該名冷氣師傅又說：「人哋大師傅日工八百元，佢學徒仔最多三、四百元，好快就使晒啲錢。」後來阿泰連開飯錢都要問同事借，又話賣老翻撈偏門先搵到快錢：「有人教佢向財務公司撲水，佢第一次就借到六萬蚊。」阿泰在地盤取出一大疊銀紙及借貸文件吹噓，豪請工友北上尋歡，不到一個月便花光借款，之後又再向財務公司借錢，前後借了二十萬元，最後遭債主登門追債，被迫搬家避債。
「捉條女姦咗佢」常掛嘴邊
「雖然阿泰有啲古怪，都唔算係乜，但係佢成日將『捉條女姦咗佢』掛喺嘴邊，有時講啲嘢都幾核突，啲同事都笑佢變態，但係冇人當真，只當佢吹吓水啫。」曾與阿泰共事的人指他為人聰明及有口才：「講道理冇人夠佢講，佢一唔夠人講就發爛渣。」又指「如果佢行正路，應該係一名好叻嘅推銷員。」阿泰做了九個月便離開，○六年有舊同事在廟街見過阿泰賣盜版光碟。直至阿泰被捕及樣貌在報章曝光後，才知他牽涉殺人碎屍案。
阿泰在庭上曾直言，迷上毒品是因為貪玩，形容吸毒後好似醉酒，「標冷汗」及很「High（興奮）」，但索得太多會不舒服，試過索到流鼻血，現在惹禍終明白毒害。