出事小巴滿載乘客，昨晨沿元朗公路開去上水，途中懷疑收掣不及，高速撞向前面一架貨櫃車車尾。今次意外嘅原因有待警方調查，不過，有受傷乘客話，意外發生嗰陣，小巴車速顯示器超過九十公里，懷疑司機當時瞌緊眼瞓無煞到車。

警方話，出事現場限速八十公里，唔係交通黑點，上次大車禍嘅旺角道彎位，警方亦話唔係黑點。查實，「隱形黑點」全港九新界不知幾多，亡命飛車冇人理，香港幾乎度度都係黑點，度度都可能發生炒車死人慘劇。正如有立法會議員話齋，搞成咁，根本就係政府監管失職，打擊超速駕駛不力。

嗱，上個月旺角道車禍之後，本報記者曾經坐過多條專線小巴調查超速情況，發現唔少車速顯示器根本形同虛設。時速超過八十公里，顯示器有閃燈同響號，但時速達一百一十三公里嗰陣，顯示器反而冇晒聲，擺明裝假狗啦。就算唔係裝假狗，顯示器不停發出「嘟、嘟」聲，司機一樣照飛可也。

叮！好似尋日出事嘅屯門至港鐵上水站44A號專線小巴咁，班次頻密、乘客眾多，但限速八十至一百公里嘅路段，實際車速長時間超過一百公里，咁搞法，唔出事至奇。呢啲情況唔係一日兩日，如果運輸署同警方有足夠重視，就唔會有咁多人無辜枉死啦！

講開呢兩個部門真係火都嚟埋，佢哋舊年年底見亡命飛車失控，於是推出「公共小巴道路安全駕駛計劃」，市民仲以為政府嚟真，點知原來係卸膊，要乘客自己舉報超速小巴。有乘客第一次搭呢條專線小巴，上車冇耐就發覺唔對路，十五分鐘由上水飛到屯門，打去警察交通熱線投訴，對方居然要事主去警署落口供。

叮！到目的地仲執得番條命已經算好彩啦，又要去警署，日後仲要上法庭，直頭攞市民嚟煩，同阻止佢哋投訴有乜分別？更離譜嘅係，運輸署話已經同小巴營辦商講過，如果司機超速嚴重，會影響佢哋續牌。有冇搞錯呀？牌唔使日日續，車可以日日飛，呢啲措施有冇阻嚇作用，心照啦。

其實，亡命飛車問題唔難解決，加把車速鎖就得，如果咁都嫌煩，用「原始」啲嘅方法，由警方「放蛇」檢控，更簡單直接。咁點都有效過將責任推晒畀市民啩？

亡命小巴通街飛，車速顯示器係咁閃、係咁嘟，有關部門好似睇唔到又聽唔到咁，視覺聽覺「雙失調」，呢個政府冇得救咯。叮！