上水河上鄉居民瞓醒覺推開門，咦！點解前面嘅景色好似唔同咗嘅？係咪好似嗰套卡通片《沖天救兵》咁，間屋唔知因乜事被綁咗成千上萬嘅氣球，一夜之間飛咗去南美洲呀？不過睇真啲，原來只不過門口塊菜地畀人當做垃圾堆填區，堆滿晒泥頭廢棄物。
當地居民睇見就眼火爆，諗住報官究辦啦，點知嗰位環境局副局長潘潔唔捉傾倒廢料嗰個，反而要菜田業主三十日內將塊地還原，如果唔係就會提出檢控咁話喎。
喂，如果嗰堆係口靚模寫真集就話啫，唔使潘副局長講，半日就可以畀麻甩仔清晒啦！知唔知堆廢物面積有成兩個足球場咁大呀，可以運去邊呢？唔使擔心，此地不留人，自有留人處，一於運去禮賓府或者政府總部啦，反正嗰度已經咁多廢官，傾倒多啲啲廢物，應該唔多覺嘅。
版主：小白(@^@)"
銜頭：評論員
特徵：路見不平，Blogger相助