民政事務局前局長何志平退出官場後，潛心寫書、搞國情教育，尋日佢夫婦一齊現身書展，問佢暑假有乜大計時，出名廿四孝爸爸嘅肥平話，今個暑假要化身書僮，陪囡囡溫習，原來佢嘅寶貝女淦璇嚟緊升小三，要應付首次全港性系統評估試，所以肥平要陪女讀書囉。
小三使唔使咁大壓力呢？明星出身嘅何太胡慧中就覺得讀書最緊要冇壓力，佢快人快語道來：「我唔使個女樣樣都叻，讀書中亭，游水唔會浸死就得㗎喇！」話雖如此，畢業於台大歷史系嘅胡慧中係公認嘅早年台灣娛樂圈高材生，家吓佢不時會講中外歷史故事畀淦璇聽，培養囡囡對歷史嘅興趣。
而身為前高官嘅肥平英文同廣東話俱佳，胡慧中嘅母語又係普通話，淦璇日常生活已經好容易學到兩文三語，佢哋大可以放心噃。