暑假來臨，新一屆立法會嘅首個立法年度工作結束，十七個新丁議員畀人品評表現，港大民意研究計劃更公布關於新丁嘅調查，結果發現，工聯會潘佩璆同廠商會林大輝嘅知名度最低，佢哋兩個同樣嚟自功能界別，但一個代表工會，一個代表商會，點解代表工會嘅潘佩璆知名度可以低到冇一個受訪者噏得出佢個名呢？難道佢過去一年嘅議會工作冇人見到，畀人當透明？
潘佩璆日前喺電台承認做咗成年議員冇人識有少少唔開心，仲自嘲話：「我一向唔會刻意提高知名度，因為我由細到大都冇乜人留意！」佢憶述當年考完升中試後，班主任第二日就好緊張咁逐個學生問考成點，唯獨冇問到佢，直至落堂響鐘班主任才忽然醒起：「差啲唔記得咗你添！」
潘佩璆跟住又話：「其實有人聽我講嘢！」其中一個例子就係第一次喺立法會大會上提出有關推動科研嘅動議後，財經事務及庫務局局長陳家強讚佢講得好。
唉，佢呢番自我安慰真係令人無言，尊貴嘅立法會議員一年有好多工作，接見團體、出席大會細會，又要聽工會嘅意見，曝光率好高，依家服務嘅對象唔識佢，官員嘅客套說話真係唔提都罷啦！