海洋公園加價嘅消息宣布後，旅遊界同市民都意見多多，尋日係周末，主席盛智文帶海洋公園嘅「威威司令」去書展，撐佢哋提供資料嘅書籍《親親小熊貓》場，但佢哋到場十五分鐘就要趕另一場，完全冇時間好似往日咁扮吓嘢。
不過，扮嘢文幾忙都好，都要為公園可能延遲加價解畫一番，佢話明白立法會議員同社會唔希望海洋公園加價，佢哋都冇人希望加價，但海洋公園面對本地同海外主題公園嘅競爭，又要償還翻新工程嘅貸款、利息同提升競爭力，所以要確保唔蝕本。至於延遲加價一事，佢就話要等今個禮拜召開董事局商討。
扮嘢文解畫時，用盡同理心嘅招數，一時話加價唔係容易嘅決定，一時又話舊年只有兩成遊客係以正價門票入場，佢哋會繼續推多啲優惠票，講到遊客好似唔受影響咁。